بين الغيرة والشك شعرة لازم نشوفها كويس

معظم الخلافات بين ادم وحواء سببها في الاصل الغيرة والشك
ممكن يبقى ادم وحواء عايشين في منتهى السعادة والاتنين على قدر كبير من مكارم الاخلاق والصفات الجميلة يعني مفيش حد فيهم وحش
ويدخل بينهم الشك لسبب او لاخر ممكن يكون وهمي من الاساس فينفصلوا ويتهد كيان أسرة سعيدة

ناس كتير بتعتبر الغيرة والشك حاجة واحدة وبيعتبروا الانسان اللي بيغير انسان شكاك ومعندوش ثقة في نفسه وده طبعا مش صحيح اطلاقا لان الغيرة حاجة كويسة ومطلوبة ولا بد منها
لان لو حواء مش بتغير على ادم يبقى بنسبة كبيرة مش بتحبه اصلا
ولو ادم مش بيغير على حواء يبقى فيه حاجة غلط لان الراجل اللي مش بيغير على اهل بيته ميبقاش راجل
بل فوق كدا كمان مش هيدخل الجنة بنص حديث الرسول صلى الله عليه وسلم :(لا يدخل الجنة ديوث)
والديوث ده اللي غيرته على محارمه واهل بيته = صفر
والحمد لله معتقدش ان حد فينا كدا لان المصريين دمهم حامي :D
ولو في مشاكل في المجتمع المصري فهي بسبب زيادة الغيرة مش نقصها

عشان كدا محتاجين نعرف حدود الغيرة لحد فين وايه الخط اللي لو الغيرة تجاوزته هتدخل في مجال الشك

في الاول لازم نعرف يعني ايه غيرة ويعني ايه شك ونشوف الفرق بينهم

الغيرة هي احساس بيتنقل من طرف للتاني احساس بيتنقل من غير كلام احساس جميل بيجبر الطرف التاني انه يحترم مشاعر اللي قدامه لو كان بيحبه بجد .. احساس بيزود الحب بين الطرفين مش بيخنق واحد فيهم

يعني باختصار لو ادم بيغير على حواء هي بتحس بده من غير ما يتكلم ولو بتحبه بجد هتاخد بالها من تصرفاتها بعد كدا عشان متعملش حاجه تزعله من غير حتى ما يطلب منها ده بشكل صريح

طب ايه هو الشك

احساس قاتل ومدمر
يبدا واحد من الطرفين يغير ع التاني .. في الاول يغير من حاجات تستدعي الغيرة فعلا ويزعل ويتخانق ويخاصم بسبب كدا
ولما يلاقي الطرف التاني بيكرر نفس الموقف ومش عامل حساب لغيرته يبتدي يتجنن والغيرة تزيد جواه
فيبتدي يغير من حاجات طبيعية جدا وعادية جدا ويبتدي يخنق الطرف التاني ويراقب تصرفاته بدون ما يحس والشك مالي قلبه ويفضل وراه وفي باله انه هيمسك عليه دليل لخيانته
طبيعي بتفكيره ده انه مش هيصدق منه كلمة
والشك لو دخل في اي علاقة بيدمرها
مش بين ادم وحواء بس بل بين اي اتنين من بني البشر

بصراحة حاسس اني كاتب كلام متلخبط ومش مترتب عشان كدا هاقول مثال يوضح اكتر

ادم وحواء اتفقوا انهم يخرجوا يتعشوا بره وبالصدفة ادم قابل صديق له ومراته وقعدوا الاربعة يتعشوا مع بعض ويتكلموا ويهزروا ويفتكروا ذكريات الصداقة الجميلة

بعد ما روحوا الييت ادم كان متضايق وتعبيرات وشه متغيره ومش بيتكلم فحواء خدت بالها وحست انه متضايق لانها من غير ما تقصد هزرت بشكل مبالغ فيه مع صاحبه وهما قاعدين ع العشا
قامت بكل حب صالحته ووضحت له انها فعلا متقصدش وانها بتحب غيرته عليها وهتاخد بالها بعد كدا
وانتهت المشكلة من قبل ما تبدا اصلا لان ادم عارف حواء كويس و واثق فيها و واثق انها بتحترم مشاعره في حضوره وبتحفظه في غيابه
و واثق في اخلاقها وعقليتها ولو غلطت مرة من غير قصد فكلنا بشر وخطائين

على الجانب الاخر بقى
صديق ادم لما روح البيت دب مع مراته خناقة كبيرة عشان هزرت مع ادم بشكل مبالغ
ومهما تشرح له انها متقصدش هو مش مقتنع ويقولها لما بتعملي كدا وانا قاعد امال في غيابي هتعملي ايه ؟!!!!!!!!!!
يبدا صديق ادم يشك في كل حاجة حواليه
لو ادم جه يزوره في البيت مرة يشك انه مش جاي عشانه هو ؟!! رغم انه كون واحد يزور صاحبه في بيته ده شيء عادي جدا
يبدا صديق ادم يرفض يزور ادم في بيته ولو اضطر يروح هيروح لوحده ويسيب مراته في البيت
لو صديق ادم بره البيت مثلا واتصل على مراته لقى التليفون مشغول لفترة طويلة هيشك فيها ويشك انها تكون بتكلم ادم؟؟!!
رغم انه ببساطة ممكن تكون بتكلم حد من صاحباتها او اهلها او حتى نسيت السماعة مرفوعة ومخدتش بالها :D

على فكرة سوء النوايا من سوء العمل
يعني اللي بيفترض الخيانة في الاخرين غالبا بيبقى هو نفسه مستعد يخون
واللي بيفترض الكدب في كلام الناس غالبا بيبقى هو متعود يكدب في كلامه كتير

اللي بيحط الحدود بين الغيرة والشك عوامل كتيرة منها تفكير الشخص وعقليته + مبادئه وقيمه اللي اتربى عليها + البيئة اللي نشا فيها وعاداتها وتقاليدها
يعني مثلا حدود الغيرة في دول اوروبا تختلف عن مصر تختلف عن دول الخليج زي السعودية

وجوه مصر تختلف في القاهرة عن الوجه البحري عن الوجه القبلي والصعيد

في حاجات ممكن تبقى مقبولة في مكان ما وتعتبر خيانة عظمى في مكان اخر

لكن لو اخترنا الوسط واتكلمنا عنه
فاللي بيفصل بين الغيرة والشك هو فكر الانسان وثقته في نفسه وثقته في شريك حياته
وعشان الطرفين يبقوا مرتاحين من الاول لازم يبقى في حاجات متفقين عليها من اول يوم
ويبقى كل واحد راضي بطباع التاني من قبل ما الارتباط يحصل

يعني مثلا واحد غيور اوي مش عاوز مراته حد يشوفها خالص فقرر يحطها بين اختيارين
يا تقعد في البيت وتسيب شغلها يا تلبس النقاب
وتبدا المشاكل .. طب ليه ارتبط بيها من الاول
كان من الاول يختار واحدة منقبة او واحدة مش بتشتغل
مش يختار واحدة مفيهاش اي صفة عاجباه ويحاول يغيرها ويبتدي يخنقها

ولازم كل طرف من الطرفين يفهم ان الطرف التاني لو اتخنق لدرجة كبيرة هيبتدي يفكر في الخيانة
ومش هيمنعه منها الا دينه ومبادئه بس مش الحصار المفروض عليه

وخلاصة القول
الغيرة لو بقت شك = نار تحرق صاحبها وتحرق اللي حواليه
والغيرة لو انعدمت = حياة باردة جامدة معدومة المشاعر

واحب اختم بشعر قال الرائع هشام الجخ عن الغيرة :

وبقولها ايوه بغير .... ايوه بغير
لا انا نقصان ولا ضعفان ولا مسطول ولا سكران ولا زايغ من عيني الضي
ولا حد احسن مني في شي ... بس بغير
واللي قالولك غيرة الراجل قلة ثقة او قلة فهم خلق حمير
غيرة الراجل نار في مراجل نار بتنور مبتحرقش

وقال في الاخر :
وانا مبقولش تخاصمي الناس ولا تتحجبي عن الرجالة ولا تعتكفي وتسكني دير
بس يا ريت حبة تقدير اني بحبك واني بريدك واني زرعت حياتي في ايدك
واني غزلت بنات الدنيا عقود على جيدك واني تعبت من التفكير واني بغير


وفي شاعر اسمه عبدالله الفيصل قال :
أكاد أشك في نفسي لاني .... اكاد اشك فيك وانت مني
يقول الناس انك خنت عهدي .... ولم تحفظ هواي ولم تصني
وما انا بالمصدق فيك قولا ... ولكني شقيت بحسن ظني




يارب الموضوع يعجبكم :)