حــــــ آدم و ــــواء

إنتي مرتبطة؟!

2011-04-03T12:15:00.000-07:00

إنتي مرتبطة؟!

تستقبل السؤال بدهشة واستغراب ليس له مثيل

تحمر عيناها

تهم لعمل شئ ما لزعزعة استقراره

تتذكر لبرهه انه يجلس في بيتها وابيها واباه يجلسان في هذه الجلسة العائلية الغير لطيفة بالمرة فتقرر الهدوء ومحاولة السيطرة على الاعصاب وترد: نعم؟! i beg your pardon؟

يرد بمنتهى البلاهة والاصرار: انتي مرتبطة؟!

"في عقلها: لأ بقى الواد ده غبي ومصمم اعمل فيه زي ما هند صبري كانت بتعمل في العرسان في مسلسل عايزة اتجوز"

تنظر لبابا لعله يفعل شئ ما ولكنه لا يفعل

تنظر لعمو لعله يسكت "الواد العبيط ده" ولكنه لا يفعل بل يضحك على خفة دم ننوس - اقصد - نجله هأ هأ هأ

تقرر الرد بحكمه مرة تانية فالناس في بيتنا وميصحش

انا مش مخطوبة وتشير الى يديها الخاليتين من الدبل

هو: ايوة مانا شايف انك مش مخطوبة انا بسأل لتكوني حضرتك مرتبطة كده ولا كده :D ؟

"هي في عقلها: لأ ده مصمم بقى لازم ياخد الجرعة >:)"

هي تشمر عن ساعديها زي اللي داخل خناقة, وتتبدل الابتسامة الصفرا على وجهها بأخرى تحسسه انها هتاكله وتحمر عيناها الضيقتين: this is so rude,sir.....you can't ever ask a decent lady this question

تحمر عيناه وينتفض: فظ؟ انا فظ؟

لأ وقح سعادتك, قصدتها وقح :d

شايف يا بابا الحقنى انا بتشتم

يسكت الجميع عن ضحكاتهم الصاخبة التي تملأ المكان ليشاهدوا تلك الفتاة "الهبلة" التي تسب العريس اللي جايلها من عند ربنا لأ وبالانجليزي كمان عاملة فيها مثقفة يعني

"هي لا ترى اي مما يحدث وتعاود التركيز على وجهة الذي صار هدفها اخافتة وزعزعة استقراره في الحياة وتكريهة في اليوم اللي قرر يتجرأ ليسئلها هذا السؤال" :ايوة طبعا وقح!!! في بنى آدم محترم يسأل بنت سؤال زي ده وفي بيتها وقدام باباها؟ ده انت معندكش دم يا اخي, وانت مالك؟ :mad:

أصل

"تقاطعه"

مفيش أصل , أصل ايه؟ أصل اللي اختشوا ماتوا والزوق والرجولة اتعدموا

تستمر في تهزيقه

البنت حضرتك مبتبقاش مرتبطة غير في حالتين يا مخطوبة وساعتها هتشوف الدبلة او في حد متكلم عليها وده يسئل فيها باباها او مامتها مش هي!!!! وفي حالة انك عايز تجيبلها عريس او انت عايز تتقدم تبقى تتقدم واهلها يردوا عليك اذا كان في حد متكلم عليها او لأ انما مش اول مرة تشوها فيها تقولها انتي مرتبطة؟ وانت مالك؟ too personal to be public حيات البنات الشخصية مش مشاع اي حد يسأل عن اي حاجة حضرتك

ولعلمك

انا معملتش فيك اللي كان المفروض يتعمل

انا راعيت انك ي بيتنا وباباك وبابايا قاعدين

ادم وحواء و ميدان التحرير

2011-02-17T09:56:00.000-08:00

لو كنت كتبت العنوان ده من شهركان هيبقى له معنى تاني غيراللي اقصده دلوقتي لان ميدان التحرير من شهر كان بيمثل لنا ميدان كبير في موقع حيوي في القاهرة
وبيمثل للبعض مكان للاحتفال بننزل نحتفل فيه كل ما نفوز بكاس افريقيا

لكن دلوقتي اصبح ميدان التحرير رمز للثورة وبمجرد ذكر اسم الميدان في اي وسيلة اعلام او في اي قعدة بين اهل او اصحاب بيجي في بالنا على طول احداث الثورة
باختصار زي الاغنية اللي بتقول : التحرير كان اسم ميدان .. أصبح للثوار عنوان

ميدان التحرير هيفضل مخلد في التاريخ كشاهد على ثورة من اعظم الثورات في تاريخ البشرية
وبقول اعظم مش من منطلق عاطفي لكن بقول كدا لان دي الحقيقة اللي اعترف بيها العالم واجمع عليها
ثورة شارك فيها ملايين ولم يستشهد سوى 300 وشوية فقط- والفاعل معروف وهيتحاكم باذن الله -تبقى طبعا ثورة سلمية
ثورة شارك فيها كل طوائف الشعب الغني والفقير بيقسموا لقمة العيش مع بعض
شارك فيها المسلم والمسيحي من غير ما تحصل فتنة طائفية
شارك فيها الولد والبنت ومتسجلش فيها حدوث حالة تحرش واحدة
بعد ما خلصت الناس نزلت نضفت الميدان والشوارع
تبقى طبعا ثورة متحضرة
الثورة اللي هتتدرس في المناهج التعليمية لانجلترا واللي اتقال عن اللي قاموا بيها انهم يستحقوا نوبل للسلام لازم بالتاكيد تبقى اعظم ثورة

وعشان كدا الموضوع اللي هكتيه عن موقف ادم وحواء من الاشتراك في الثورة ونزول المظاهرات
كل واحد فيهم رايه ايه في نزول التاني للمظاهرات
وبما اني امثل ادم هاكتب عن راي ادم في نزول حواء للمظاهرات
وهسيب الشق التاني من الموضوع وهو راي حواء وموقفها من نزول ادم للمظاهرات
لان اللي هتكتب الشق ده هي حواء وبالتحديد نيـــــــــــــو صاحبة فكرة الموضوع كله من الاساس ومن موقعي هذا بحييها بجد على الفكرة دي :)

في اراء اصبحت قديمة بالنسبة لنزول المظاهرات من وجهة نظري ع الاقل
يعني مثلا الراي اللي بيقول ابعد عن المظاهرات وامشي جنب الحيط
امن الدولة بياخد اي حد دلوقتي وفي قانون طواريء
الراي ده من اكثر الاراء الشائعة قبل ثورة 25 يناير والتفكير بالطريقة دي للاسف هو اللي خلانا عايشين في سجن 30 سنة
لكن بعد نجاح الثورة الحمد لله والتطورات اللي ترتبت عليه معتقدش حد هيفكر تاني بالطريقة دي
ومعتقدش اي حد بعد كدا هيكون سبب رفضه للتظاهر السبب ده
واللي لسه بيفكر بالطريقة دي بعد كل اللي حصل يبقى للاسف ميستحقش يعيش وسط الاحرار
عشان كدا هستبعد الراي ده من الاراء لانه ملوش قيمة

لو هتكلم عن نفسي ورايي في نزول حواء المظاهرات فالراي مش هيختلف كتير لو حواء بتمثل الام او الاخت او الزوجة او الابنة
لان اكيد كلهم بالنسبة لي قريبين مني وغاليين عليا وتهمني سلامتهم ويهمني في نفس الوقت احترم رغبتهم في المشاركة والتعبير

لو المظاهرات فيها ضرب واشتباكات اكيد همنعهم من النزول طبعا وبدون نقاش لاني مش مستغني عن حد فيهم :D
النقطة دي مفروغ منها عشان كدا الكلام الجاي كله هيبقى في حالة لو المظاهرات سلمية ومفيش خطر على حواء وامنها الشخصي

لو المظاهرات سلمية والمتظاهرين في امان هبقى في صراع داخلي بين الخوف عليهم بشكل طبيعي وغريزي وبين انهم من حقهم ينزلوا يعبروا عن رايهم لانهم جزء من الشعب
لو حواء الاخت او حواء الابنة في سن صغيرة مش هخليها تنزل خوفا عليها لانها في الاخر طفلة لكن لو واجهت منها اصرار شديد ع النزول وشايف ان المظاهرات امنة ومفيش خطر عليها هاخدها معايا وهبقى فرحان بيها وفرحان انها حرة وعندها ارادة حرة من صغرها ولما تكبر هتبقى شجاعة ومش هتسيب حقها
لكن لو حواء الاخت او الابنة في سن الشباب وحماس الشباب هسيبها تنزل وتشارك وتعبر عن رايها وحتى لو يوم منعتها بدافع الخوف الغريزي والطبيعي وتمسكت انها تنزل ونزلت رغم رفضي هكون فخور بيها
وفخور بتمسكها بحريتها و هنزل معاها او هقترح عليها انها تنزل مع اصدقائها او قرايبها عشان اكون مطمن انها مش لوحدها

لو حواء الام او حواء الزوجة عاوزة تشارك في المظاهرات هسمح لها تنزل معايا عشان ابقى مطمن عليها وفي نفس الوقت مبقاش حرمتها من حقها المشروع في التعبير عن رايها بحرية

حاسس ان انا برغي كتير وكلامي تايه ومش مترتب بس الخلاصة عشان محدش يتوه مني انا مع نزول حواء المظاهرات بشرط ضمان امنها الشخصي وسلامتها وعدم تعرضها للاذى
ولو كانت في سن الشباب هبقى فخور بيها لو نزلت لوحدها انما لو كانت صغيرة او كبيرة هاخدها معايا عشان تبقى قدام عيني وابقى مطمئن اكتر عليها

هستعرض اراء ناس حواليا من المشاركة في الثورة
هستعرض ارائهم في مشاركتي انا كادم وهسيبكم تتخيلوا رايهم في مشاركة حواء
في ناس شايفاني فاضي وبضيع وقت واتقالتلي لللاسف بالنص : " ايه الللي وداك التحرير .. انت فاضي ؟ " وكان ردي باختصار : " معلش .. اجازة بقى وفاضيين - مع ابتسامة عريضة "
رديت بالطريقة دي لان اللي بيفكر كدا حرام ادخل معاه في نقاش واوجع قلبي ع الفاضي
في ناس شايفة ان دي قلة ادب
ازاي تنزل في الشارع وتهتف ضد رئيس بلدك اللي بقالك 30 سنة عايش في حماه
الناس دي هتدخل جحورها قريب ان شاء الله
وفي ناس شايفة اني بطل عشان نزلت وكلمة للاسف بقت بتتقالي كتير : " انت جبتلنا النصر وجيت " عشان يعني نزلت في الايام الاخيرة قبل التنحي ورجعت البيت يوم التنحي
الناس دي منهم اللي بيقولها كمداعبة وهزار .. ومنهم للاسف اللي بيقولها بجد لان نظرته ضيقة وسطحية اوي
الابطال هما الشهداء اللي ماتوا عشان احنا نعيش والابطال هما المصابين اللي هيدخلوا الجنة باصابتهم يوم القيامة الابطال هما اللي اعتقلوا واتبهدلوا وخاطروا بحياتهم الابطال هما اللي عاشوا في التحرير ال18 يوم كاملة وكل يوم عندهم يقين بالله بيزيد مع الايام ان ربنا هينصرهم ويرجعهم بيتهم منتصرين

هسيب القلم لنيــــــــــو عشان تكتب الشق التاني من الموضوع :)

وكل ثورة وانتم طيبين
وربنا يجعل كل ايامنا حرية وسعادة

مبرووووووووووك لمصـــر وارفعوا رؤوسكم فخرا فانتم مصريون :)

بين الغيرة والشك شعرة لازم نشوفها كويس

2011-01-03T05:30:00.001-08:00

معظم الخلافات بين ادم وحواء سببها في الاصل الغيرة والشك
ممكن يبقى ادم وحواء عايشين في منتهى السعادة والاتنين على قدر كبير من مكارم الاخلاق والصفات الجميلة يعني مفيش حد فيهم وحش
ويدخل بينهم الشك لسبب او لاخر ممكن يكون وهمي من الاساس فينفصلوا ويتهد كيان أسرة سعيدة

ناس كتير بتعتبر الغيرة والشك حاجة واحدة وبيعتبروا الانسان اللي بيغير انسان شكاك ومعندوش ثقة في نفسه وده طبعا مش صحيح اطلاقا لان الغيرة حاجة كويسة ومطلوبة ولا بد منها
لان لو حواء مش بتغير على ادم يبقى بنسبة كبيرة مش بتحبه اصلا
ولو ادم مش بيغير على حواء يبقى فيه حاجة غلط لان الراجل اللي مش بيغير على اهل بيته ميبقاش راجل
بل فوق كدا كمان مش هيدخل الجنة بنص حديث الرسول صلى الله عليه وسلم :(لا يدخل الجنة ديوث)
والديوث ده اللي غيرته على محارمه واهل بيته = صفر
والحمد لله معتقدش ان حد فينا كدا لان المصريين دمهم حامي :D
ولو في مشاكل في المجتمع المصري فهي بسبب زيادة الغيرة مش نقصها

عشان كدا محتاجين نعرف حدود الغيرة لحد فين وايه الخط اللي لو الغيرة تجاوزته هتدخل في مجال الشك

في الاول لازم نعرف يعني ايه غيرة ويعني ايه شك ونشوف الفرق بينهم

الغيرة هي احساس بيتنقل من طرف للتاني احساس بيتنقل من غير كلام احساس جميل بيجبر الطرف التاني انه يحترم مشاعر اللي قدامه لو كان بيحبه بجد .. احساس بيزود الحب بين الطرفين مش بيخنق واحد فيهم

يعني باختصار لو ادم بيغير على حواء هي بتحس بده من غير ما يتكلم ولو بتحبه بجد هتاخد بالها من تصرفاتها بعد كدا عشان متعملش حاجه تزعله من غير حتى ما يطلب منها ده بشكل صريح

طب ايه هو الشك

احساس قاتل ومدمر
يبدا واحد من الطرفين يغير ع التاني .. في الاول يغير من حاجات تستدعي الغيرة فعلا ويزعل ويتخانق ويخاصم بسبب كدا
ولما يلاقي الطرف التاني بيكرر نفس الموقف ومش عامل حساب لغيرته يبتدي يتجنن والغيرة تزيد جواه
فيبتدي يغير من حاجات طبيعية جدا وعادية جدا ويبتدي يخنق الطرف التاني ويراقب تصرفاته بدون ما يحس والشك مالي قلبه ويفضل وراه وفي باله انه هيمسك عليه دليل لخيانته
طبيعي بتفكيره ده انه مش هيصدق منه كلمة
والشك لو دخل في اي علاقة بيدمرها
مش بين ادم وحواء بس بل بين اي اتنين من بني البشر

بصراحة حاسس اني كاتب كلام متلخبط ومش مترتب عشان كدا هاقول مثال يوضح اكتر

ادم وحواء اتفقوا انهم يخرجوا يتعشوا بره وبالصدفة ادم قابل صديق له ومراته وقعدوا الاربعة يتعشوا مع بعض ويتكلموا ويهزروا ويفتكروا ذكريات الصداقة الجميلة

بعد ما روحوا الييت ادم كان متضايق وتعبيرات وشه متغيره ومش بيتكلم فحواء خدت بالها وحست انه متضايق لانها من غير ما تقصد هزرت بشكل مبالغ فيه مع صاحبه وهما قاعدين ع العشا
قامت بكل حب صالحته ووضحت له انها فعلا متقصدش وانها بتحب غيرته عليها وهتاخد بالها بعد كدا
وانتهت المشكلة من قبل ما تبدا اصلا لان ادم عارف حواء كويس و واثق فيها و واثق انها بتحترم مشاعره في حضوره وبتحفظه في غيابه
و واثق في اخلاقها وعقليتها ولو غلطت مرة من غير قصد فكلنا بشر وخطائين

على الجانب الاخر بقى
صديق ادم لما روح البيت دب مع مراته خناقة كبيرة عشان هزرت مع ادم بشكل مبالغ
ومهما تشرح له انها متقصدش هو مش مقتنع ويقولها لما بتعملي كدا وانا قاعد امال في غيابي هتعملي ايه ؟!!!!!!!!!!
يبدا صديق ادم يشك في كل حاجة حواليه
لو ادم جه يزوره في البيت مرة يشك انه مش جاي عشانه هو ؟!! رغم انه كون واحد يزور صاحبه في بيته ده شيء عادي جدا
يبدا صديق ادم يرفض يزور ادم في بيته ولو اضطر يروح هيروح لوحده ويسيب مراته في البيت
لو صديق ادم بره البيت مثلا واتصل على مراته لقى التليفون مشغول لفترة طويلة هيشك فيها ويشك انها تكون بتكلم ادم؟؟!!
رغم انه ببساطة ممكن تكون بتكلم حد من صاحباتها او اهلها او حتى نسيت السماعة مرفوعة ومخدتش بالها :D

على فكرة سوء النوايا من سوء العمل
يعني اللي بيفترض الخيانة في الاخرين غالبا بيبقى هو نفسه مستعد يخون
واللي بيفترض الكدب في كلام الناس غالبا بيبقى هو متعود يكدب في كلامه كتير

اللي بيحط الحدود بين الغيرة والشك عوامل كتيرة منها تفكير الشخص وعقليته + مبادئه وقيمه اللي اتربى عليها + البيئة اللي نشا فيها وعاداتها وتقاليدها
يعني مثلا حدود الغيرة في دول اوروبا تختلف عن مصر تختلف عن دول الخليج زي السعودية

وجوه مصر تختلف في القاهرة عن الوجه البحري عن الوجه القبلي والصعيد

في حاجات ممكن تبقى مقبولة في مكان ما وتعتبر خيانة عظمى في مكان اخر

لكن لو اخترنا الوسط واتكلمنا عنه
فاللي بيفصل بين الغيرة والشك هو فكر الانسان وثقته في نفسه وثقته في شريك حياته
وعشان الطرفين يبقوا مرتاحين من الاول لازم يبقى في حاجات متفقين عليها من اول يوم
ويبقى كل واحد راضي بطباع التاني من قبل ما الارتباط يحصل

يعني مثلا واحد غيور اوي مش عاوز مراته حد يشوفها خالص فقرر يحطها بين اختيارين
يا تقعد في البيت وتسيب شغلها يا تلبس النقاب
وتبدا المشاكل .. طب ليه ارتبط بيها من الاول
كان من الاول يختار واحدة منقبة او واحدة مش بتشتغل
مش يختار واحدة مفيهاش اي صفة عاجباه ويحاول يغيرها ويبتدي يخنقها

ولازم كل طرف من الطرفين يفهم ان الطرف التاني لو اتخنق لدرجة كبيرة هيبتدي يفكر في الخيانة
ومش هيمنعه منها الا دينه ومبادئه بس مش الحصار المفروض عليه

وخلاصة القول
الغيرة لو بقت شك = نار تحرق صاحبها وتحرق اللي حواليه
والغيرة لو انعدمت = حياة باردة جامدة معدومة المشاعر

واحب اختم بشعر قال الرائع هشام الجخ عن الغيرة :

وبقولها ايوه بغير .... ايوه بغير
لا انا نقصان ولا ضعفان ولا مسطول ولا سكران ولا زايغ من عيني الضي
ولا حد احسن مني في شي ... بس بغير
واللي قالولك غيرة الراجل قلة ثقة او قلة فهم خلق حمير
غيرة الراجل نار في مراجل نار بتنور مبتحرقش

وقال في الاخر :
وانا مبقولش تخاصمي الناس ولا تتحجبي عن الرجالة ولا تعتكفي وتسكني دير
بس يا ريت حبة تقدير اني بحبك واني بريدك واني زرعت حياتي في ايدك
واني غزلت بنات الدنيا عقود على جيدك واني تعبت من التفكير واني بغير

وفي شاعر اسمه عبدالله الفيصل قال :
أكاد أشك في نفسي لاني .... اكاد اشك فيك وانت مني
يقول الناس انك خنت عهدي .... ولم تحفظ هواي ولم تصني
وما انا بالمصدق فيك قولا ... ولكني شقيت بحسن ظني

يارب الموضوع يعجبكم :)

Love is just a Spark!!!!!

2010-12-26T14:52:00.000-08:00

"love is only the spark. but to make fire that warms ur soul both of u has to work on ur love, add wood and protect it from winds so it can blossom. otherwise that beautiful spark will fade out. love needs effort to be each other soul mate and partner"

لقيت الكلام ده في تعليق على مدونة احمد خالد توفيق

سبحان الله لسه كنت بتكلم في موضوع the spark

ده امبارح واول امبارح

كنت عايزة اكتب note

بس مكنتش عارفة ازاي!!!!

بس التعليق ده ألهمنى

خلينا في الأول نعرّف يعني ايه spark

spark is when two people meet the 1st time and from the first sight they have a long gazing and staring look they don't know why or when that happened but it just happened

تقريبا اللي الناس ممكن تفتكره حب من النظرة الاولى

في نظرتي هي مش حب هي مقدمة للحب

يعني شئ مبدأي للشعور بارتياح شخص ما ممكن يتطور لإعجاب ثم حب

that spark عندي كافية انها لو حصلتلي مع حد لو كلمنى هفكر فيه وابتدي اشوف اذا الموضوع ممكن يتطور لحب ولا لأ

الحب ده شئ بيبنوه اتنين زي شجرة كده عشان كده مش مقتنعه بمبدأ الحب من طرف واحد هو تعلق ممكن بس مش حب اكيد مفيش واحد لوحده هيقدر يروي الشجرة دي لازم حد يبادله نفس الشعور او يديه امل عشان الشعور ده يكبر

السؤال هنا

is the spark alone enough to build love?
Is the spark something in love or it's nothing and it can just simply fade away?

لسه الموضوع ليه كمالة محدش يكون فكرة عن اللي في دماغي لحد ما انزل الحلقة التانية :)

Too perfect to be loved....

2010-12-26T14:46:00.000-08:00

Too perfect to be loved

مثالية اكتر من اللازم كي تٌحب

او

مش بعرف اترجم من انجلش لعربي اوي فلو حد عنده ترجمه افضل من كده ياريت يقوللي عليها

المهم let's get into the point

الناس اللي اقرب للمثالية من وجهة نظر الناس وجودهم في الحياة بيحسس غيرهم انهم مش كويسين في الافلام الامريكاني كتير بنسمع المصطلح ده بيتقال you are too perfect to be loved للناس اللي حياتها مرتبة وبتحسب كل حاجة قبل ماتتعمل وبتتصرف صح

يعني لما هما يغلطوا ويشوفوا غيرهم مثالي ومبيغلطش زيهم وجوده قدامهم بيحسسهم اد ايه هما وحشين

تيجوا نحسبها بالمنطق

هل عدم وجود الشخص الكويس ده مش هيحسس الناس التانيين انهم وحشين

طيب تعالوا نسميهم عشان نرتاح

اللي بيقولوا عليه مثالي اسمه "*"

اللي مش بيحبوا المثالي وشايفين ان وجوده بيبين انهم وحشين اسمهم "# "

هل عدم وجود * في حياة # هيخليهم يبقوا كويسين يعني؟

يعني لو جماعة حرامية عايشين مع بعض مش هيحسوا انهم حرامية غير لما ييجي حد مش حرامي يعيش معاهم؟

هل احنا مش بنشوف الغلط غير لما نشوف الصح؟

اه ممكن بردو

بس فكرة اننا نشوف الغلط او منشوفوش ده لاينفي اننا بنعمله

يعني وجود * مش هو اللي بيخلي # وحشين لأ هو اللي بيبينلهم حقيقتهم

يعني * مهمين عشان يكشفوا للناس حقيقة نفسهم

ممكن نسميهم المراية اللي البشر بتشوف فيها نفسهم

هما مش مراية اوي يعني عشان actually

كل * بيبقى محتاج * تاني عشان يشوف فيه نفسه

يعني مفيش حد كله # او كله *

عشان احنا بشر تركيبتنا خير وشر محناش ملايكة كلنا خير او شياطين كلنا شر

مش مبرر اننا نشوف حد منظم واحنا مهملين اننا نكره الشخص المنظم ده عشان بيورينا اد ايه احنا مهملين بنظامه

عشان احنا بردو عندنا حاجة احسن منه بتبينله مدى النقص اللي عنده فيها كل مايشوفها عندنا

N.B: البشر بيكملوا بعض مش ضد بعض

ربنا خلقنا غير بعض عشان نكمل بعض مش نكره بعض

انا كده عرضت وجهة نضر # و اللي بيبص عالموضوع من فوق

نشوف بقى وجهة نظر حد من ال* او اللي الناس بتقول عليهم * رأيهم ايه

يمكن في الاول بيبقوا مبسوطين ومرتاحين بكده انهم مبيغلطوش كتير وبالتالي مبيندموش كتير

بس الناس دي بتفكر كتير اوي, كتير لدرجه مبيعرفوش يوقفوا مخهم وبيبقى عامل زي المكنة الزنانة اللي مش عايزة تقف_احساس وحش اوي على فكرة ان يبقى في مكنة زنانة شغالة 24 ساعه في دماغك

احيانا بيشتاقوا انهم يغلطوا زي كل البشر ويبطلوا جلد ذات شوية ماهو الغلط ليه متعة بردو والاستهتار ليه متعة تخيل واحد فقد القدرة انه يبقى مستهتر وهايف

حتى لو حاول يبقى كده مبيعرفش وكل اللي حواليه محسسينه انه كائن فضائي مش منهم_احساس بشع طبعا

تخيل الشخص او الشخصة دول بقى لما يحبوا حد والحد ده يبقى شايفهم too perfect to be loved

آن آن آنننننننننننن

موسيقى تصويرية

كده دخلنا في شغل الافلام والحب الضائع والحاجات الكتير اللي ضايعة

والناس اللي تقعد طول عمرها looking for Mr. and miss right

الصراع هنا بيبقى انهم بيتعاقبوا عشان هما كويسين

طيب الحل ايه؟

يبقوا مش كويسين يعني عشان يعجبوا؟

مش هيعرفوا

فقدوا القدرة على انهم يبقوا مش كويسين اصلا

طيب والحل؟

مش عارف

لو حد لقى حل يقوللي

يمكن هما من الاول محبوش صح

او اختاروا صح

مع العلم ان مغزى كلمة حب هنا مش يعني حد يتجوز حد لأ حب اصحاب حب أهل حب حبيب

في ناس من كتر ماهما صح اوي بيخنقوا اللي حواليهم واقرب الناس ليهم فعلا

يمكن الحل في تقبل الآخر

هما يتقبلوا غيرهم وغيرهم يتقبلهم ويبطلوا ينقدوا في بعض؟

ولا يدوروا عاللي زيهم ويعيشوا على جزيرة نائية _حلوة نائية دي_ ويشيدوا اليوتوبيا بتاعتهم هنك ويُريحوا ويستريحوا؟

يمكن

او يمكن الغلط اصلا في ال categorization

سواء اللي هما حاطوا نفسهم فيه او غيرهم حطهم فيه

no body is perfect that's for sure

and off course no body is too perfect to be loved

يمكن هما بس لسه ملقوش اللي يقدرهم ويقدروه

او يمكن مستعجلين

وبعدين الدنيا دي دٌنيا من الدونية يعني الكويس فيها صعب يرتاح

رأيي المفروض يستبيعوا ويختاروا الآخرة عشان الصراع ده هيفضل دايما موجود الدنيا ام الآخرة

ومعتقدش حد هيقدر يجمع بين الاتنين

والاهم من ده كل القناعة

ان الانسان يبقى قنوع باللي في ايده ويحمد ربنا عليه وميبصش لغيره لا بالتطلع باللي في ايده ولا بالقرف على حالة ميبصش لحد خالص كل واحد يخليه في نفسه احسن

وفي النهاية احب اقول ان كل اللي اتكتب ده شخبطة من مخلفات المكنة الزنانة اللي شغالة عندي

وعادي يا جماعة مش انا لوحدي اللي بخرف في ناس كتير بتخرف زيي حبيت اقولهم انهم بيخرفوا وانا معاهم :d

واخيرا تعرف ايه عن المنطق !!!!!!!

:D :D

N.B 2: اه وحاجة كمان

لكل اللي متضايق انه/انها بيتقالهم الكلمة دي انتوا مثاليين زياده عن اللزوم او too perfect to be loved

احب اقولكم ردوا وقولوا للي بيقولكم كده

and you are too fool to be tolerated

حقا هل حواء زنانة؟

2010-02-07T13:12:00.000-08:00

قاعده تانية مع النفس للتفكير في احوال البشر

Adam and Eve آدم وحواء

هل حواء زنانة؟

تعالوا نفكر بالمنطق

"ترتدي عبائة الحكمة_ انا اللي برتديها طبعا"

عارفين لما حد يبقى فاهمك لدرجة انه قاعد في دماغك؟
حافظك لدرجة تخنق
عايز يعملك كل حاجة وميتعبكيش
يعيش بدالك
ده بيخنق بيحسس ان حد عايش بدالي
someone is stealing my life

مساحة يتحرك فيها
احنا مش بنسمح للمساحة دي
احنا عايزين نبقى موجودين بنشاركهم النفس اللي بيتنفسوه
يمكن عشان احنا بنعرف نخلق لنفسنا المساحة دي في وجودهم
بس هما مبيعرفوش يخلقوها في وجودنا
لازم احنا من حين للآخر نبعد شوية
عشان نسيبلهم المساحة دي
فعلا آدم محتاج مساحة لنفسه شوية
هما محتاجين مساحة يحسوا فيهم انهم احرار
فتكين
وقت ما مش كل حاجة فيه نبقى فاهمينها كده

الشباب بيبقوا محتاجين مساحة يحسوا فيها انهم مش تحت الحصار من البنات
مساحة للحرية
مش لازم تبقى البنت عايشة جوه دماغه وفاهمة وعارفه عنه كل حاجة
ومعاه في كل خطوة بيعملها او بيخططلها حتى
مش عايزاه يقع ويبقى دايما صح بس هو عايز يقع ويجرب ويتعلم
مش عايز دايما حد متشعبط فيه
صح ولا ايه؟

عشان كده بتعتبرونا معشر البنات زنانات صح؟

المشكلة ان احنا كبنات بنعرف جدا نخلق المساحة واحنا شاركينكم في كل حاجة
بس انتوا لأ
وبعدين عندنا الاشراك ده بيقوي ال bond

وبما انهم واحد يبقوا لازم يبقوا روح واحده يعملوا كل حاجة مع بعض
متديلوش فرصة يتنفس تشاركه في كل حاجة حتى نفسه
عشان تقوي ال bond

بس انتوا لأ
وبعدين عندنا الاشراك ده بيقوي ال bond

وبما انهم واحد يبقوا لازم يبقوا روح واحده يعملوا كل حاجة مع بعض
متديلوش فرصة يتنفس تشاركه في كل حاجة حتى نفسه
عشان تقوي ال bond
حواء بتتعامل مع آدم انه نصها التاني وانهم واحد

ده غير ان حواء آدم بالنسبالها الفارس المغوار
الملك اللي هيتوجها ملكة على مملكته ويحمي هو المملكة دي ويقوم بكل الواجبات وميغلطش

هي لو غلطت هو هيصلحلها انما هو لما يغلط مين يصلحله؟

آدم كائن مثالي يقدر يعمل كل حاجة ويحل كل العقبات
وحواء ماهي الا كائن ضعيف يحتاج للحماية

وان قصر في حمايتها تشعر بالخطر

وانتوا عارفين الواحد لما يشعر بالخطر بقى بيتجنن ويبقى شرس
وتبدأ بمطالبته بحمايتها حتى من نفسها

دي مشكلة ال false believes

we always thing Adam is super hero not a human being

حتى المثقفات من حواء ال false believes دي جواهم وبيخلوهم يتصرفوا على اساسهم كتير
على النقيد في false believe تاني موجود

ان آدم طفل حواء هي امه
معرفش الاتنين موجودين مع بعض ازاي!!!!! وده يفسر ان الانسان ملئ بالمتناقضات

حواء مش مستوعبة انها المفروض تبقى جنب آدم تسنده مش فوقه تسحقه

we have to be supportive not pressuring

آدم هو مركز حياة حواء وهي عاوزاه تبقى هي مركز حياته
مش قادرين نستوعب اننا فعلا مركز حياتهم بس بطريقة اعم واشمل

يعني آدم لما يقعد جنبي فاكر كل تفصيله من حياتي وفاكر كل ذكرى ويسيب شغله ومنلاقيش ناكل ونأكل الاولاد

مش الماديات بس في مسؤوليات كتيرة اوي

مش معنى كده ان آدم ياخد كل المسؤوليات ويرمي حواء

يهتم بيها بردو بس لو نسى تفصيله تبقى تفكره بهدوء مش بشراسة

نديهم الفرصة ياخدوا وقتهم في اتخاذ القرار

مش لازم تبقى معاهم وهما بياخدوه ونطالبهم بالسرعة كمان وفي نفس الوقت القرار يطلع صح

حاسة اني دخلت الدنيا كلها في بعض وجبت حاجات من الشرق والغرب

بس الخلاصة انAdam needs a space

وآدم محتاج يفهم حواء عشان يقدر ظروفها وحواء محتاجة آدم يفهمها نفسه عشان تقدر ظروفه المختلفة عنه

يعني محتاجين نفهم بعض

سلام عشان ابتديت ادخل امريكا عاليونان

فين النصيب؟

2009-05-28T12:58:00.000-07:00

هي ليه الناس مبقتش راضية بنصيبها؟
ليه بيبتدوا بدايات غلط اصلا ويقعدوا يعيطوا بعدها ويقولوا اتظلمنا؟

ليه مش مقتنعين ان كل شئ مكتوب واننا منملكش غير اننا نرضى بنصيبنا

محدش بيموت ورا حد
ولا حد بيموت لما بيسيب حد او حد بيسيبه

ليه مش مقتنعين ان في موضوع الجواز ده بالذاااااااااااااااات اللي ليك نصيب فيه هتاخده

لو كل البشر اجتمعت انها تفرق بين اتنين في لحظة كل شئ هيتصلح طالما مكتوبين لبعض

وولو كل الناس كانت مع جواز اتنين ربنا مش كاتبلهم الجواز في اخر لحظة الموضوه هيتفشكل

كله نصيييييييييييييييييييييييييييييييييييييييييييييييي يييييييييب

بجد بجد تعبت من كتر مابسمع كلمة هموت من غيرها ,هموت من غيره.

خلاااااااااااااااااااااااااااااااااااااص يابشر كفاااااااااااااااااااااااااااااية حراااااااااااااااااااااااااااااااااااااااااام

حب تيك اواى

2009-02-13T18:39:00.000-08:00

كنت نزلت خاطرة فى منتدى وعلى فكرة نيو حبيبتى هى نفس اللى نزلتها على بلاطى المهم فى المنتدى اللى نزلتها فيه الناس هناك كان ردودهم ان الحب عذاب وان الحب ده حاجة مأساة وواضح من كلامهم انه عن تجارب شخصية فأنا فضلت افكر ياترى ليه كل الشعب المصرى بقى مجروح بالشكل ده

طبعا قلت اكيد فى حاجة مش صح هل ياترى دى لانه بطبيعة جيلنا جيل مستعجل الحب فيه بقى تيك واى.او كل واحد فاقد نوع من الاهتمام فى البيت بيحاول يدور عليه بره البيت مع حد فاكر انه بيحبه وممكن يكون نوع بس من التعود او انه حابب بس يحس انه مرغوب فيه من الجنس الآخر

انا دايما اقول الحب يفشل امتى فى حالة من الاتنين يااما مع شخص مش مناسب او

التوقيت نفسه مش مناسب

الحب انا شايفة انه مشاعر جميلة اوى اكيد مش عذاب بس الشباب ولاد وبنات هما اللى بيعملوا ده فى نفسهم بمعنى يبقى او تبقى فى دراسته ومحمل نفسه حاجات مش وقتها انتم عارفين ان الضغط بيولد الانفجار بمعنى فى كلية مثلا زى كليتنا الموقرة(سورى اقصد اللى عايزة ضرب النار)طبعا مضغوطين جدا وده يمكن فكرنى بجملة لطيفة جدا الدوكتر بتاعنا قالها

لو انت مثلا عندك امتحان لو نفرض انه جراحة (وماادراك مالجراحة )طبعا ضغط رهيب قال للولاد ايه مع اول ممرضة هتقابلك هتقول هى دى انا عايزة اتجوز ماليش دعوة ههههه

واحيانا الحب ده بيكون بجد حب بمشاعره البريئة حب حقيقى المشكلة ان البنت بترتبط قبل الشاب بحكم التقاليد والظروف الاجتماعية يعنى حب الجامعة ده اكتر من تسعين فى الميه منه كلام فارغ

او ممكن السبب فى فشل الحب ده انه يكون حب قلب بس وده طبعا ماينفعش لان االحب لازم يكون حب بيباركه العقل ماينفعش احب بمشاعرى بس اكيد مش هينتهى نهاية صح وبعدين ماينفعش حد يعذب قلبه ويعلق نفسه بحد وهو مش مستعد ياخد خطوة ارتباط وعارف انه مش ليه يبقى ليه؟مااحنا اللى بنجيب العذاب ده لنفسنا

ودايما الحب هيبقى كويس وينتهى نهاية سعيدة لو كان مع الانسان الصح فى الوقت الصح فى وقت تحس فيه انك اد مسئولية الارتباط حاسس انك مستعد كفاية انك تدخل حد تانى حياتك وتسمحلك يشاركك فيها بكل صور المشاركة

وفى النهاية اللهم اهدى شبابنا وبناتنا وجمع المتحبين فى الله بالزواج

الزواج عن طريق النت

2009-01-23T10:31:00.001-08:00

النهاردة هنتكلم عن الزواج على الانترنت وياترى حضرتك مع اى رأى ياترى مع ان الحب فى اى مكان موجود ولا نت لاء و مرفوض

وجهة النظر الموافقة

ناس مش بتفرق معاهم موضوع النت وبيعتبروه وسيلة زى اى وسيلة اى حد ممكن يتعرف بيها وان الحب والقبول فى اى مكان موجود .وان المكتوب مكتوب وان ربنا هو اللى بيكتب للانسان ازاى هيقابل شريك حياته حتى لو غلطة تليفون

الناس دى بتعتمد على احساسها كتير على فكرها اكتر .بمعنى انها واثقة عارفة انها هتقدر تفرق كذب الانسان ده من صدقه وهتبين خداعه او غشه

والرأى المعارض

يعنى فى ناس بتقول ازاى الواحد يحب حد ويربط مصيره وحياته بشخص فى النهاية هو مستخبى ورا شاشة وان النت عمره ماكان وسيلة ابدا كفاية

لان على النت سهل جدا حد يخدع, سهل جدا حد يغش .سهل جدا حد يلعب بمشاعر حد.بلاش كده ممكن ترسم ليه صورة فى خيالك معينة ويطلع غيرها تماما لان الانسان فى النهاية ماهو الا روح عمره ماكان كلام ابدا مكتوب

وباعتبار اننا مجتمع شرقى ويعنى غالبا بيكون الشاب غيور ممكن تلاقيه بيقول زى ماعرفتنى ممكن تكون عرفت حد تانى وزى ماسمحتلى ادخل جواها ممكن تكون سمحت لحد تانى .وفى بنات استحالة هى كمان تقول اكيد عرف يجى بنات كتير قبلى لان فى نظرهم النت وسيلة سهلة جدا ان حد يكون علاقات ده

ناس تانية ممكن تكون مش معترضة بس معترضة على الشكل الاجتماعى ويكون رفضها الوحيد لما حد يسألنى اتعرفتوا ازاى هقول ايه .لان اغلب الاسر ومجتمعنا مازال بيرفض الفكرة بعتبرها حاجة اب نورمال حاجة غريبة على دينا ومعتقداتنا

انا حاولت اعرض آراء مختلفة واحب اعرف رأيكم فى الموضوع ده ياترى انتم مع ولا ضد

ليه الاستعجال؟

2008-12-24T11:58:00.000-08:00

كان في سؤال عايزة اسأله من فترة بس مكنتش عارفة اسأله ازاي

هو ليه الشباب دايما مستعجل

او بمعنى ادق ليه الرجل دايما مستعجل؟

يعني ليه لما واحد يروح يصارح واحدة انه معجب بيها او بيحبها بيكون عايزها ترد في الحال؟

هل هو اول ما شافها راح كلمها واخد القرار في الحال؟ ولا خد شوية وقت عقبال ما فكر واختبر مشاعره؟

ليه دايما عند الشباب التصور بإنه عشان بيفكر في بنت فهي بتفكر فيه في نفس الوقت وبتمر بكل المراحل اللي هو بيمر بيها معاه عشان كده لما يصارحها هي المفروض تقول انا موافقه على طول

ولما البنت تطلب فترة تفكر وترد فيها تلاقيه هو مستعجل ومتعصب ومش قادر يصبر ومتوتر جدا

ليــــــــــــــــــــــــــــــــــــــــــــــــــــــــه؟

هي مش ليها الحق انها تاخد وقتها وتفكر زي ما انت ما فكرت وقررت؟

هو قرار الموافقة على شريك الحياة والارتباط ده سهل عشان اول ما يروح يكلما توافق على طول؟

مش في لسه اهل لازم تاخد رأيهم ومحتاجة تتكلم معاه وتعرفه اكتر قبل ما تتربط معاه بوعد

عارفين البنات بتفكر ازاي في الموضوع ده؟

القرار بيبقى صعب اوي اوي

عشان هي عارفه ان قرارها ده يا هيطلع واحد سابع سما ويديله امل كبير لو وافقت

يا هينزل واحد سابع ارض وممكن يكسره لو رفضت

من الصعب انها تكسر انسان بس من الصعب انها ترتبط بيه لمجرد انها مش عايزة تكسره

ومن الصعب انها تديله امل وتسحبه منه تاني عشان هي اتسرعت في اعطائه الامل ده

القرار بيبقى صعب بجد فوق ماتتخيلوا

البنت فيه بتتخلى عن كل تفكيرها الطفولي وبتقعد تفكر في حياتها مع الانسان ده هل هو هيبقى زوج كويس وهيحميها وهتحس معاه بالامان ولا لأ؟ هل هو هيبقى اب كويس ولا لأ؟ هل هما لو ارتبطوا هيكملوا ولا ممكن الموضوع ينتهي بجرحهم هما الاتنين

الموضوع بيبقى اصعب لو هما اصدقاء او العيلة اصدقاء او اقارب عشان في حالة فشل الخطوبة او الزواج معنى كده ان الصداقة دي انتهت
يعني هي فقدت انسان مهم في حياتها لمجرد انهم حبوا يغيروا علاقتهم ببعض من اصدقاء الي احباء هيتجوزوا

طيب المفروض الولد يعميل ايه؟

اللي البنت عايزاه انه يطمنها مش بكلام الحب لأ بالافعال يوريها انه محترم قرارها جدا وان كل اللي يهمه سعادتها تى لو رفضته يديها الsupport

يحاول يفهمها وميستعجلهاش وميحسسهاش بالذنب لمجرد انها عايزة وقت تفكر عشان تقرر

لو حست انه صبر عليها وانه بيحبها بجد وانه هيحميها من العالم كله ومن نفسه ومن نفسها اذا لزم الامر وان سعادتها بس هي اللي تهمه وانهم هيبقوا زي الاول واحسن ايا كان القرار ومش هيخسروا بعض وان كل حاجة قسمة ونصيب

ساعتها بس هيتشال الضغط العصبي من عليها وهتعرف تفكر صح وساعتها بس الوقت اللي هتاخده وهي مضغوطة هيبقى اكتر كتير من الوقت اللي هتاخده وهي مرتاحة

بيتهيألي اللي بيحب حد بيحب يشوفه مرتاح ولا ايه؟

عايزة اعرف اراء الرجال عشان اعرف دوافعهم هما مستعجلين ليه؟

اهداء الى حبيبتى

2008-12-14T05:15:00.000-08:00

اسمحوا لى ان اشارك معكم بهذه الخاطرة التى كتبتها فى أعز انسانة فى حياتى وان شاء الله عن قريب شريكة حياتى

------------

أحترت ماذا اسميك ... حبيبتى أم أمى ؟؟؟

وكيف لا تكونى أمى وعيناك قادرة على حمل همى ؟؟

وقلبك يمنحنى دفء يسرى فى جميع انحاء جسدى وحبا يجرى فى دمى

***

ماذ اناديك ؟؟ حبيبتى؟؟ وهل تصف هذه الكلمة مقدارك عندى ؟؟؟

هل تعبر عن ذلك البركان الثائر فى قلبى ؟؟

هل تطفىء نار اشتياقى اليكى وسهدى ؟؟

***

من تكونى بالله عليكى ؟؟؟

حبيبتى ؟؟ أمى ؟؟ ام كنز وضعه فى طريقى ربى ؟؟

رسالة إلى كل زوج مصري : إزاي تحافظ على بيتك

2008-11-26T20:20:00.000-08:00

بعد ما اتكلمنا عن الزوجة المصرية وإيه واجباتها نحو زوجها

هنتكلم عن واجبات الزوج لان عشان الحياة تستمر والمركب تمشي وتقدر تصمد قدام رياح المشاكل- اللي بتحصل في أي بيت واللي لا بد منها- لازم الاتنين يقوموا بواجباتهم على أكمل وجه وكل طرف يوفي التاني حقه

أول نقطة عايز اتكلم فيها هي ان لازم الزوج يبقى فاهم طبيعة زوجته وطبيعة المرأة بصفة عامة
لازم يبقى عارف انها رقيقة وحساسة ويتعامل معاها من المنطلق ده فيتجنب انه يجرحها او يأذي مشاعرها يحاول يتغاضى عن الامور الصغيرة التافهة وميعملش مشكله لاتفه الاسباب ويحاول يحتويها بحكمته وعقله في الامور الكبيرة يوجهها للصح وينصحها باللين والرفق ويشيل من دماغه فكرة ان طالما أنا راجل البيت يبقى ازعق واشخط وانطر زي ما أناعايز لان الاسلوب ده هيجرحها وحتى لو كانت من النوع اللي بيصبر ويستحمل فهي في الاول وفي الاخر بشر واكيد صبرها له اخر

والاسلوب اللين هيوصله للنتيجة الصح اللي هو عايزها وهيساعده انه يحتوي المشكلة وينهيها بدل ما يكبرها والكلمة الحلوة بتأثر في أي بشر مهما كانت طبيعته قاسية فما بالك بكائن اصلا رقيق وحساس هو المرأة - الرسول صلى الله عليه وسلم قال :رفقا بالقوارير - يقصد النساء

والزوج العاقل هو اللي يقدر ينهي المشكلة بينه وبين زوجته من غير ما يسمح لطرف تالت انه يدخل بينهم سواء كان من القرايب او الجيران او الاصدقاء لان دخول طرف تالت في المشكلة في معظم الاحوال ممكن يكبرها ويعقدها
لازم الزوج يكون دايما قريب من زوجته يتكلم معاها ويسمعها ميبقاش طول النهار في شغله وبالليل بيتفرج على التلفزيون او بيقرأ في مجلة او جريدة او كتاب ومش مديها أي اهتمام لان تصرفه ده بيبعدها عنه شوية بشوية وبدل ما تشتكي له همومها هتضطر تشتكي لحد من أهلها والمفروض هو يكون أقرب الناس ليها

لازم كمان الزوج يرفع من معنويات زوجته ويشجعها ويخليها تكتسب الثقة في نفسها ولو كانت بتشتغل يساعدها انها تكون ناجحة في شغلها طالما هي مش مقصرة في حق بيتها وأولادها وقادرة انها توفق بين الاتنين

ولازم الزوج يعبر لزوجته عن حبه لها من وقت للتاني فمثلا يجيبلها هدية رقيقة حتى لو مفيش مناسبة فالهدية مهما كانت بسيطة ولو كانت مجرد وردة فهي بتحمل مشاعر جميلة وبتأثر في نفسية الزوجة وبتسعدها

كمان لازم الزوج يفصل بين الشغل والبيت يعني لو في مشاكل في شغله يحاول ينساها بمجرد دخوله البيت ويحاول دايما يبتسم قدام زوجته ويحتفظ بهدوءه ويتجنب العصبية جوا البيت بل ممكن يحكيلها المشكلة بهدوء يمكن تساعده في حلها

لازم كمان الزوج لو عنده وقت يساعد زوجته في شغل البيت وللاسف بعض الرجال مش عايز اقول معظمهم بيعتبرها عيب او نقص ان هو يطبخ او يكنس او يغسل وده طبعا مفهوم خاطيء تماما لان سيد الخلق أجمعين وخير البشر سيدنا محمد صلى الله عليه وسلم كان بيساعد زوجاته ولنا في رسول الله صلى الله عليه وسلم القدوة والمثل الأعلى

لازم الزوج يحافظ على صورته قدام زوجته يكون دايما قدامها الانسان اللي تثق فيه وتحس بالامان معاه ميعملش تصرفات تقلل من شأنه
لازم يفضل كبير في نظرها بس في نفس الوقت يكون بيتصرف على طبيعته ولا يدعي او يصطنع المثالية

لازم الزوج يكون عالي الاحساس يحس بزوجته لو كنت تعبانة يحاول يريحها ويقوم بشغل البيت بدلا منها
لو متضايقة يحاول يفهم ايه السبب ويحاول يسعدها ويفرحها
لو حزينة لاي سبب كفقدان قريب مثلا يراعي مشاعرها

لازم الزوج كمان يحترم زوجته قدام الاولاد عشان يتعودوا من صغرهم على احترامها فمثلا ميوافقش الاولاد على حاجة هي رفضتها طالما مفيش منها ضرر عشان يتعودوا انهم يسمعوا كلامها

وللحديث بقية

يازوجة يامصرية يارب اشوفك سعيدة ومتهنية

2008-11-13T08:43:00.000-08:00

انا قعدت مع نفسى وفضلت افكر ايه اللى ممكن اكتبه والحقيقة احترت وبعدين قررت انى اكتب عن الزوجة المصرية والمفروض ازاى تكون زى ماربنا قال والرسول

وازاى تتعامل مع زوجها لاننا كمصريين للاسف بنتعلم من واحنا صغيرين ازاى نكون اب وام ولكننا عمرنا مابنتعلم ازاى نكون زوج وزوجة والحقيقة الاتنين بينهم اختلاف كبير بس فى النهاية الاتنين مكملين وبيأدوا لنفس الطريق

بيعلموا الولد الصغير لازم تكون جامد وفى البيت لك صوت مسموع لازم تتحمل المسئولية وتوفر الفلوس لكن هل ياترى بيعلموه ازاى يتعامل مع الانسانة اللى هتشاركه حياته ازاى يكون الزوج الحمول

وكذلك البنت بتتعلم ازاى تكون ام ازاى تطبخ وتكنس وفى البيت وترتب وعلى الزوج وتنكد والامثال السخيفة اللى كتير بنسمعها زى جوزك على ماتعوديه

وانا هتكلم النهاردة عن الزوجة

.ك

بقولها حبيبتى عاملى زوجك مش كأنه زوجك عامليه كأبنك كتير بيكون محتاج لحنانك محتاج حد يسمعه ويخفف عنه الهموم محتاج اول لما يرجع البيت

يلاقى ابتسامة بريئة مرسومة على شفايفك محتاج يسمع منك كلمة طيبة تنسيه تعبه محتاج يحس ان البيت هو الامان بالنسبة ليه هو اللى فيه هيرتاح .....مش فيه هيلاقى الصداع ووجع الدماغ

لما تلاقيه راجع البيت تعبان مش تكلميه سيبه يهدى... سيبه يتكلم وحتى لو رفع صوته معلش اتحمليه انت ماتعرفيش ايه اللى مر بيه

ماتحاوليش تطلبى منه طلبات كتير انت اكيد عارفة امكانياته تسمح بأيه واكيد تقدرى تعرفى امتى الوقت اللى تسألى فيه ولو انتى بتشتغلى حاولى على اد ماتقدرى انك توفقى

لان فى النهاية بيتك وزوجك واولادك دول امانة بين ايديك وكمان شغلك ده امانة ورسالة انا عارفة ان ده فيه تعب عليكى بس دى رسالتك لازم تعمليها وعلى اكمل وجه تأديها

زمانك بتقولى انى عايشة فى الاحلام وان كلامى ده اوهام بس والله لا بس انا شفت كتير ناس سعيدة فى حياتها وكانت الزوجة هى الاساس صدقينى يأيديك تخلى بيتك جنة وبأيديك تخليه جهنم

بأيديك تطلعى اولادك زى ماتتمنى وانهم يكونوا فى دراستهم نجاحين تقدرى تخرجى للمجتمع ناس مسئولين وافتكر ربنا حباكى بنعم كتير كفاية بس احساس انك أم

يااااااه على جمال الاحساس لما تحسى ان فى حد مسئول منك والاجمل انك تكونى اد المسئولية وتكونى بيها سعيدة ومتهنية يااااااه لو تحاولى تقربى من زوجك وتفهميه وتحاولى على

اد ماتقدرى تريحيه وتحاولى بكل هدوء تفكرى فى مشاكل البيت حاولى تشاركيه بس علشان خاطر...... بدون ماتتعصبى علشان هتلاقيه منك بيهرب

لان الراجل فيه عيب كبير

انه بيعتقد ان كل الستات بطبيعتها بتشتكى كتير او انها بتهول الامور

وحاجة اخيرة حاولى من وقت للتانى تكسرى الروتين انك تغيرى ديكور لبيت ولو ده مكلف غيرى الاماكن بتاع الاثاث

حاولى من وقتى للتانى تخرجوا حتى ولو انكم هتتمشوا حاولوا تتكلموا بعيد عن المشاكل والضغوط وصدقينى ده هيفرق كتير وهيقربكم مع بعض اكتر

ويارب اشوفك اسعد زوجة فى الدنيا ومرتاحة مع زوجك ومتهنية

وان شاء الله المرة الجاية نتكلم عن الزوج

مين ادم ؟؟ ومين حوا ؟؟

2008-11-09T09:33:00.000-08:00

قبل ما نتكلم فى المدونة دى عن ادم وحوا وطرق تفكير كل منهم ومشاكلهم واحلامهم فى

البداية عايزين نعرف مين ادم ومين حوا؟؟

ادم ابو البشر واول بشر خلقه ربنا بيديه وسجدت له الملائكة

حواء هى اول انثى فى البشرية وخلقت من ضلع ادم الشمال بجوار قلبه " ماذال هذا الضلع ناقص فى البشر ويسمى الضلع العائم"

عاشوا فى الجنة وشافوا الملائكة

امرهم الله بأمر .............ولكن

عصوا الامر ، أخطأوا ،،،، غلطوا

انا ادم وانتى حوا ،،، هو ادم وهى حوا

احنا بشر مش ملاكية ،، توقع انها هتغلط وتوقعى انه هيغلط

لو عرفنا القاعده دى اى مشكلة هتعدى لان هيكون فيه تسامح

................ ولكن ...............

فيه اللى بيغلط وبيعترف بغلطة ويصلحة وبسرعة ،، وفيه اللى بيكابر او بيستمر فى الغلط

وهنا مينفعش التسامح ابدا

لما هبط ادم الى الارض قيل انه هط فى الهند ، وحواء هبطت فى الجزيرة العربية

فضلوا يدوروا على بعض واتقابلوا على جبل عرفات

اعتقد ان ادم تعب اكتر ،، مش كده ولا ايه ؟؟؟

التعريف بالمدونة

2008-11-09T08:22:00.000-08:00

السلام عليكم ايها القراء الكرام

حبيت بس اعرف المدونة الجديدة اسمها

Adam vs Eve

يعني آدم وحواء

مش عايزينها خناقة بين آدم وحواء

بس عايزينها تقرب وجهات النظر بينهم

هنا هناقش القضايا والمواضيع اللي تخص آدم وحواء

ونشوف وجهة نظر آدم وحواء فيها

عايزين نعرف هما بيفكروا ازاي عشان يفهموا بعض ويتعاملوا مع بعض صح

ويا رب نقدر نحقق هدفنا ونفيدكم

NeO